ក្រឡាប់រថយន្តសណ្តោងរ៉ឺម៉កចុះភ្នំដងរែកស្លាប់ម្នាក់ របួសធ្ងន់ ២នាក់ និងស្រាលម្នាក់
ឧត្តរមានជ័យ៖ រថយន្តប្រភេទកូរ៉េ សណ្តោងរ៉ឺម៉ក ចុះពីលើភ្នំដងរែកក្រឡាប់ធ្លាក់ផ្លូវ ដែលបានកើតឡើងនៅវេលាម៉ោង ១ និង៤០នាទី ថ្ងៃទី២៨ ខែ កញ្ញា ឆ្នាំ ២០២២ ដែលមានករណី គ្រោះថ្នាក់ចរាចរណ៍នេះ កើតឡើងលើកំណាត់ផ្លូវជាតិលេខ 67B ចន្លោះបង្គោលគីឡូម៉ែត្រ ១៣២-១៣៣ ( ចំណុចក្រោមរូបសំណាក់លោកយាយ ម៉ៅ ប្រហែល ១០០ ម៉ែត្រ ) ស្ថិតក្នុងភូមិជើងភ្នំ ឃុំត្រពាំងប្រីយ៍ ស្រុកអន្លង់វែង ខេត្តឧត្តរមានជ័យ។
ករណីគ្រោះថ្នាក់ចរាចរណ៍ដែលបង្កឡើងដោយខ្លួនឯងនេះ បើតាមរបាយការណ៍ពីលោកវរសេនីយ៍ទោ ហាស់ ហេង អធិការរងនគរបាលស្រុកអន្លង់វែង ដែលរថយន្តធំមានសណ្តោងរ៉ឺម៉កក្រឡាប់ខ្លួនឯង ក្នុងទិសដៅពីលិចទៅកើត បណ្តាលឲ្យមនុស្សស្លាប់ ១ នាក់ រងរបួសធ្ងន់ ២នាក់ និងរងរបួសស្រាល ១នាក់។ ដោយរថយន្តបង្កម៉ាក យីហាន់ដាយ HYUNDAIប្រភេទ (២.៥ តោន ) ពណ៍ខៀវ សេរីឆ្នាំ១៩៩៦ ពាក់ផ្លាកលេខ កំពង់ចាម 3A 1970 បើកបរដោយឈ្មោះ វ៉ា សំរិទ្ធិ ភេទប្រុស អាយុ ២០ឆ្នាំ រស់នៅភូមិត្រពាំងខ្លា ឃុំរការប្រាំ ស្រុកត្បូងឃ្មុំ ខេត្តត្បូងឃ្មុំ មុខរបរ កម្មករ បើកបរក្នុងទិសដៅពីលិចទៅកើត រងរបួសស្រាល និងអ្នករួមដំណើរ ៣ នាក់ ៖ ១- ឈ្មោះ អ៉ិន ភេទប្រុស អាយុ ១៦ឆ្នាំ រស់នៅភូមិឃ្ជូត ឃុំញ៉ាង ស្រុកអណ្តូងមាស ខេត្តរតនៈគិរី មុខរបរ កម្មករ ត្រូវរថយន្តសង្កត់ពីលើ ស្លាប់នៅនឹងកន្លែងកើតហេតុ ២- ឈ្មោះ សេង ហ៊ួង ភេទប្រុស អាយុ ៣០ឆ្នាំ រស់នៅភូមិ-ឃុំជាមួយគ្នា មុខរបរ កម្មករ រងរបួសធ្ងន់ត្រង់ក្បាល និងដងខ្លួន ។ ៣- ឈ្មោះ ហ៊ួន សំបូរ ភេទប្រុស អាយុ ៣៤ឆ្នាំ រស់នៅភូមិ-ឃុំជាមួយគ្នា មុខរបរ ថៅកែ រងរបួសធ្ងន់ដាច់ដៃខាងស្តាំ និងក្បាល។
អធិការនគរបាលស្រុកអន្លង់វែង ក្រោយពីទទួលព័ត៌មាន កម្លាំងជំនាញបានចុះទៅអន្តរាគមន៍ នាំយកអ្នករងរបួស បញ្ជូនទៅមន្ទីពេទ្យបង្អែកស្រុកអន្លង់វែង ដោយឡែកសាកសពឈ្មោះ អ៉ិន បានយកទៅរក្សាទុកនៅវត្តជ័យទឹកជុំ ( វត្តអន្លង់វែង ) រងចាំក្រុមគ្រួសារមកទទួលយកទៅធ្វើបុណ្យតាមប្រពៃណី។ ចំណែកឯវត្ថុតាងក្រោយពីធ្វើការវាស់វែងកន្លែងកើតហេតុ សមត្ថកិច្ចបាននាំយករថយន្ត និងសម្ភារៈលើរថយន្ត រក្សាទុកនៅកន្លែងកើតហេតុ រងចាំរថយន្តស្ទូចយកមករក្សាទុកនៅអធិការដ្ឋាននគរបាលស្រុកអន្លង់វែង ដើម្បីចាត់ការបន្តតាមនីតិវិធី ។
សូមបញ្ជាក់ថា មូលហេតុនៃគ្រោះថ្នាក់ចរាចរណ៍ខាងលើ បណ្តាលមកពី កត្តាយានយន្ត សាងលេខមិនចូល ឬច្រាលប្រអប់លេខ ដោយសារតែអ្នកបើកបរ ពុំធ្លាប់មានបទ ពិសោធន៍បើកបរចុះភ្នំ ហើយយោងតាមស្ថានភាព ផ្លូវកោងចុះ ពីលើភ្នំដែលមានលក្ខណៈផ្លូវចំណោទចុះខ្លាំង៕
