ល្បែងមាន់ជល់តាមប្រព័ន្ធអនឡាញរីកដូចផ្សិតចំកណ្តាលក្រុងសៀមរាប តើលោកវីរៈសេនីយ៍ឯក ដា ចំរើន បានជ្រាបដែររឺទេ...?

 ផ្សាយចេញថ្ងៃទី ៣១.១០.២០២៣

ខេត្តសៀមរាប ៖ ដូចមហាជនបានជ្រាបមកហើយថា ល្បែងស៊ីសងគ្រប់ប្រភេទ ពិសេសជល់មាន់តាមប្រព័ន្ធអេឡិចត្រូនិក កំពុងតែរីកសុះសាយគ្រប់ទីកន្លែង ពិសេសក្នុងក្រុងសៀមរាប បន្ទាប់ពីបានស្ងាត់មួយចំអិនកំពឹស ក្រោយពេលសម្តេចតេជោ ហ៊ុន សែន ប្រមុខរាជរដ្ឋាភិបាលកម្ពុជាបានចេញញាតិ្តអោយបិតរាល់ល្បែងស៊ីសងគ្រប់ប្រភេទនូវទូទាំងរាជធានីខេត្តកាលពីថ្ងៃទី ១៧ ខែកញ្ញា ឆ្នាំ២០២២ ។

ដោយឡែកនាពេលថ្មីៗនេះ ល្បែងសុីសងគ្រប់ប្រភេទពិសេសមាន់ជល់តាមប្រព័ន្ធអេឡិចត្រូនិកបានបើកដំណើរការលេងយ៉ាងអនាធិបតេយ្យនៅក្នុងក្រុងសៀមរាប សង្កាត់ណាក៏មានដែរ ក្នុងនោះមានសង្កាត់ស្លរក្រាម សង្កាត់ សាលាកំរើក ។ល។ ហើយអ្វីដែលគួរអោយកត់សំគាល់ជាងនេះទៅទៀត ល្បែងជល់មាន់តាមអនឡាញទាំងនេះ នៅមិនឆ្ងាយពីប៉ុស្តិ៍រដ្ឋបាលឡើយ និយាយរួមគឺនៅព័ទ្ធជុំវិញប៉ុស្តិ៍រដ្ឋបាលតែម្តង ។

បន្ទាប់ពីឃើញបែបនេះកាលពីថ្ងៃទី ៣០ ខែតុលាឆ្នាំ២០២៣ ក្រុមការងារអ្នកសារព័ត៌មានបានរាយការណ៍ទៅលោក វីរ:សេនីយ៍ឯក ដា ចំរើន អធិការក្រុងសៀមរាបតាមរយៈលេខទូរស័ព្ទជាច្រើនដងតែពុំមានអ្នកទទួល ដោយមិនដឹងថា លោកអធិការក្រុងជាប់រវល់ រឺយ៉ាងណានោះទេ? 

បើយោងតាមការរៀបរាប់ពីសំណាក់មេការគ្រប់គ្រងបនល្បែងទាំងនោះ បាននិយាយថា មុននិងពួកគេអាចបើកទីតាំងល្បែងអនឡាញទាំងនេះបាន គឺពួកគេបានរៀបចំតាំងពីថ្នាក់ក្រោមរហូតដល់ថ្នាក់លើ តាំងពីបុ៉ស្តិ៍ អធិការ រហូតដល់ស្នងការដ្ឋានរួចរាល់ហើយ គឺមិនអាចបោះសន្ទួចកន្លងភ្នំបាននោះឡើយ។

មហាជននៅក្នុងមូលដ្ឋានបានដាក់ការសង្ស័យថា ប្រហែលជាអស់លោកទាំងនោះត្រូវថ្នាំសណ្តំ ដូចពាក្យមេការទីតាំងបនល្បែងទាំងនោះនិយាយមែនហើយ បានជាផ្គើននិងបទបញ្ជារបស់ប្រមុខរាជរដ្ឋាភិបាល ពុំមានចំណាត់ការនិងទប់ស្កាត់បង្ក្រាបទាល់តែសោះ តើឯណាទៅភូមិឃុំមានសុវត្តិភាពទាំង៧ចំនុចរបស់រាជរដ្ឋាភិបាល? រឺមួយចេះតែទ្រឹស្តី គ្រាន់តែចេះនិយាយ តែមិនដែលអនុវត្តន៍។

ប្រជាពលរដ្ឋរងចាំមើលថា តើលោកវីរៈ សេនីយ៍ឯក ដា ចំរើន អធិការក្រុងសៀមរាប ហ៊ានប្រើកណ្តាប់ដៃដែក បង្ក្រាបល្បែងជល់មាន់តាមប្រព័ន្ធអនឡាញដែលរីកដូចផ្សិតក្នុងដែនសមត្ថកិច្ចរបស់ខ្លួនដែរ រឺយ៉ាងណា?

ប្រជាពលរដ្ឋទូទាំងក្រុងសៀមរាប គោរពស្នើសុំដល់ឧត្តមសេនីយ៍ទោ តេង ច័ន្ទណាត ស្នងការនគរបាលខេត្តសៀមរាប ឯកឧត្ដម ប្រាក់ សោភ័ណ អភិបាលនៃគណៈអភិបាលខេត្តសៀមរាប និងគោរពស្នើសុំដល់ឯកឧត្តមអភិសន្តិបណ្ឌិត ស សុខា រដ្ឋមន្ត្រីក្រសួងមហាផ្ទៃមេត្តចាត់វិធានការណ៍ចំពោះទីតាំងបនល្បែងខាងលើនេះផងទាន! ពីព្រោះតាំងពីមានល្បែងស៊ីសងនេះមក អំពើហិង្សា ចោរលួច ឆក់ បានកើតឡើងជាបន្តបន្ទាប់នៅក្នុងមូលដ្ឋាន ៕

អង្គភាពអ្នកសារព័ត៌មានយើងខ្ញុំគ្រាន់តែជាកញ្ចក់ឆ្លុះបញ្ចាំង រិះគន់ក្នុងន័យស្ថាបនា ចូលរួមចំណែកជាមួយរាជរដ្ឋាភិបាល បណ្ដាញសារព័ត៌មាន យើងខ្ញុំរង់ចាំការឆ្លើយបំភ្លឺ គ្រប់ស្ថាប័នពាក់ព័ន្ធគ្រប់ពេលម៉ោងធ្វើការតាមរបបអ្នកសារព័ត៌មានសូមអរគុណ៕

(សូមអានបន្ត)

សង្វៀនជល់មានខ្នាតយក្ស ចំកណ្តាលក្រុងប៉ោយប៉ែតបើកលេងយ៉ាងអនាធិបតេយ្យ តើលោកអធិការក្រុង បានជ្រាបដែររឺទេ?..

 ផ្សាយចេញថ្ងៃទី ២៩.១០.២០២៣

ខេត្តបន្ទាយមានជ័យ ÷ មានសេចក្តីរាយការណ៍មកថា មានទីតាំងសង្វៀនជល់មាន់ខ្នាតយក្ស កំពុងតែបើកដំណើរកាលេងយ៉ាងអនាធិបតេយ្យ ដែលមានទីតាំងស្ថិតនៅក្បែរ (ក្លិបថេកដោនចាស់) ចំនុចមាត់អូរ ស្រះទឹក ជាប់ព្រំប្រទល់(កម្ពុជា-ថៃ) ភូមិក្បាលស្ពាន សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ។

តាមការបង្ហើបពីប្រជាពលរដ្ឋនៅក្បែរនោះបានរៀបរាប់ថា ទីតាំងខាងលើនេះ បានគៀងគរក្រុមអ្នកញៀនល្បែងអោយចូលលេងយ៉ាងគគ្រឹកគគ្រេង រាប់ឆ្នាំមកហើយ ដោយពុំឃើញមានសមត្ថកិច្ចនៅក្នុងមូលដ្ឋានចុះមកធ្វើការទប់ស្កាត់និងបង្ក្រាបឡើយ សង្ស័យថា ទីតាំងសង្វៀនជល់មានខាងលើ មានខ្នងធំ និងខ្សែក្រាស់ហើយមើលទៅ បានជាបើកលេងចំកណ្តាលក្រុងហើយ គ្មានអ្នកណាហ៊ានបង្ក្រាបសោះ។

ជាក់ស្តែងនៅថ្ងៃទី ២៨ ខែតុលា ឆ្នាំ២០២៣ ក្រោមការងារអ្នកសារព័ត៌មានបានចុះទៅថតផ្តិតយករូបភាព និងបានរាយការណ៍ទៅលោកវីរៈសេនីយ៍ឯក សៅ សារឿន អធិការក្រុងប៉ោយប៉ែត តាមរយៈលេខទូរស័ព្ទលោកបានមានប្រសាសន៍ថា ជាប់ប្រជុំ ចាំហើយ ចាំលោកខលមកវិញ តែនេះគ្រាន់តែជាលេសដោះស្រាយដើម្បីយករួចខ្លួនតែប៉ុណ្ណោះ។

ប្រជាពលរដ្ឋរងចាំមើលថា តើសមត្ថកិច្ចក្នុងក្រុងប៉ោយប៉ែត មានវិធានការណ៍ទប់ស្កាត់ទីតាំងសង្វៀនជល់មាន់នូវចំនុចខាងលើបានដែររឺយ៉ាងណា?

ប្រជាពលរដ្ឋសំណូមពរដល់ឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ ពិសេស ឯកឧត្តម អ៊ុំ រាត្រី អភិបាលខេត្តបន្ទាយមានជ័យ មេត្តាមានវិធានការត្រួតពិនិត្យ នូវទីតាំងសង្វៀនជល់មាន់ខាងលើផងទាន! ដើម្បីរក្សាបាននូវភូមិ ឃុំ មានសុវត្ថិភាពទាំង០៧ចំណុច របស់រាជរដ្ឋាភិបាល សូមអរគុណ៕.

(សូមអានបន្ត)

តើការប្រមូលទិញ និងការដឹកជញ្ជូនលៀសរាប់សិបតោន របស់ឈ្មួញ ឈ្មោះ វណ្ណី ខុសច្បាប់ដែរឺទេ? ហេតុអ្វីបានជាអាជ្ញាធរមន្ត្រីជំនាញពាក់ព័ន្ធ ពិសេសជំនាញរដ្ឋបាលជលផលកំពង់ហ្លួង ពុំមានការទប់ស្កាត់និងបង្ក្រាបសោះ.

 ផ្សាយចេញថ្ងៃទី២៤.១០.២០២៣

ខេត្តពោធិ៍សាត់ ÷ មហាជននៅក្នុងប្រទេសប្រហែលជាបានដឹងនិងស្គាល់យ៉ាងច្បាស់ថា ខេត្តពោធិ៍សាត់ជាខេត្តមួយដែលជាប់និងបឹងទន្លេសាប ក្នុងចំណោមខេត្តទាំង០៥ ក្នុងនោះមានខេត្ត កំពង់ធំ ខេត្តកំពង់ឆ្នាំង ខេត្តសៀមរាប ខេត្តបាត់ដំបង និងខេត្តពោធិ៍សាត់ ។

ធនធានធម្មជាតិនិងជីវ:ចម្រុះដែលរស់នៅក្នុងទឹកនៃខេត្តពោធិ៍សាត់ត្រូវបានវិនាសដោយសារតែក្រុមឈ្មួញ និងមន្ត្រីជំនាញគ្រាប់ល្ពៅមួយក្តាប់តូច ឃុបឃិតគ្នាជាប្រព័ន្ធ ដោយសារការលោភលន់ចង់មានចង់បានហួសព្រំដែន ហ៊ានធ្វើអ្វីៗ សូម្បីតែរបស់ជាតិឯងក៏ហ៊ានបំផ្លាញដែរ ។

ជាក់ស្តែងនៅរសៀលថ្ងៃទី២៤ ខែតុលា ឆ្នាំ២០២៣ មានរថយន្តកូរ៉េ ៥តោន ចំនួន ០៤គ្រឿង ដែលមានថៅកែឈ្មោះ វណ្ណី បាននិងកំពុងដឹកជញ្ជូន លៀស ចេញពីចំនុចកំពង់ឃ្នៀស កាត់តាមភូមិកំពង់លើក ឃុំក្បាលត្រាច ស្រុកក្រគរ ខេត្តពោធិ៍សាត់ យកទៅលក់នៅប្រទេសវៀតណាមរាប់សិបតោន យ៉ាងអនាធិបតេយ្យ ដោយមិនមានការរំខានពីសំណាក់អាជ្ញាធរ មន្ត្រីជំនាញពាក់ព័ន្ធ ពិសេសជំនាញរដ្ឋបាលជលផលសោះឡើយ។

តាមការរៀបរាប់ពី ពីប្រជានេសាទបានប្រាប់អោយក្រុមអ្នកសារព័ត៌មានយើងដឹងថា ជាររៀងរាល់ថ្ងៃ ឈ្មួញ វណ្ណី បានគៀងគរប្រជាពលរដ្ឋអោយទៅកាវលៀសរាប់សិបទូកអោយយកមកលក់អោយខ្លួន ក្នុងមួយការ៉ុង៥០០០រៀល ដោយក្នុងមួយថ្ងៃៗ រាប់រយការ៉ុង បើគិតជាតោនរាប់សិបតោន ដោយខ្លួនជាអ្នករត់ការរាល់សមត្ថកិច្ច និងមន្ត្រីជំនាញពាក់ព័ន្ធនៅក្នុងមូលដ្ឋាន ពិសេសជំនាញជលផលគ្រប់លំដាប់ថ្នាក់ទូទាំងខេត្តពោធិ៍សាត់រួចរាល់ហើយជាថ្នូរនិងការមិនបង្ក្រាប។

តាមការបង្ហើបពីប្រជាពលរដ្ឋ បានរៀបរាប់ថា ថៅកែលៀសជើងខ្លាំងរូបនេះ មិនមែនទើបតែធ្វើសកម្មភាពនេះទេ គឺធ្វើរាប់ឆ្នាំមកហើយ ។ ក្រុមការងារបានទំនាក់ទំនងទៅលោក ភិន វណ្ណា នាយផ្នែករដ្ឋបាលជលផលកំពង់ហ្លួងតាមរយៈទូរស័ព្ទដើម្បីធ្វើសេចក្តីរាយការណ៍ លោកបាននិយាយថានិងអោយក្រុមការងារចុះត្រួតពិនិត្យ 

ចំណែកលោក ភុំ និមល នាយខណ្ឌរដ្ឋបាលជលផលខេត្តពោធិ៍សាត់ ក្រមការងារមិនអាចទំនាក់ទំនងបានទេ ដោយខលចូលជាច្រើនដង ប៉ុន្តែពុំមានអ្នកលើកទូរស័ព្ទ។

ប្រជាពលរដ្ឋសំណូមពរដល់ឯកឧត្តម ខូយ រីដា អភិបាលខេត្តពោធិ៍សាត់ និងជាគណៈអភិបាលខេត្ត និងគោរពស្នើរសុំដល់ឯកឧត្តម ឌិត ទីណា រដ្ឋមន្ត្រីក្រសួងកសិកម្មរុក្ខាប្រម៉ាញ់និងនេសាទមេត្តាមានចំណាត់ការណ៍លើឈ្មួញ ឈ្មោះ វណ្ណី ចាស់វស្សាខាងលើនេះផងទាន បើពុំដូច្នោះ ធនធានធម្មជាតិនិងជីវ:ចម្រុះដែលរស់នៅក្នុងទឹក ក្នុងខេត្តពោធិ៍សាត់ច្បាស់ជាវិនាសអស់ជាក់ជាពុំខានបើក្នុងមួយថ្ងៃៗរាប់សិបតោនយ៉ាងនេះ។

អ្នកសារព័ត៌មានគ្រាន់តែជាព្រាបនាំសារ ពីថ្នាក់ក្រោមទៅរាជរដ្ឋាភិបាល រិះគន់ក្នុងន័យស្ថាបនា គ្មានចេតនាជាន់ពន្លិចស្ថាប័នពាក់ព័ន្ធណាឡើយ អង្គភាពសារព័ត៌មានយើងខ្ញុំរងចាំការបកស្រាយបំភ្លឺពីគ្រប់ស្ថាប័នពាក់ព័ន្ធ ក្នុងម៉ោងធ្វើការតាមរបបស្តីពីអ្នកសារព័ត៌មានក្នុងព្រះរាជាណាចក្រកម្ពុជា សូមអរគុណ៕

(សូមអានបន្ត)

ក្រុមឈ្មួញកំពុងសម្រុកដឹកទំនិញចូល និងចេញពីប្រទេសវៀតណាមតាមច្រករបៀងព្រែកជ្រៃយ៉ាងគំហុក ដោយមិនដឹងថារាល់ទំនិញទាំងនេះបានត្រួតពិនិត្យត្រឹមត្រូវតាមច្បាប់ដែររឺទេ?...

 ក្រុងសំពៅពូន ២១.១០.២០៣

  ខេត្តកណ្តាល ÷ សកម្មភាពដឹកទំនិញទាំងផ្លូវទឹក ទាំងផ្លូវគោគឆ្លងទៅប្រទេសវៀតណាម តាមច្រករបៀងមួយកន្លែងដែលស្ថិតនៅបណ្តោយផ្លូវលេខ ២១បេ សង្កាត់ព្រែកជ្រៃ ក្រុងសំពៅពូន ខេត្តកណ្តាល ដោយមិនដឹងថាការដឹកជញ្ជូនរាល់ទំនិញទាំងនេះ បានត្រួតពិនិត្យតាមលក្ខណៈស្តង់ដារបច្ចេកទេសរបស់អជ្ញាធរមន្ត្រីជំនាញពាក់ព័ន្ធ ពិសេសការិយាល័យគយនិងរដ្ឋាករជ្រៃធំ-ខ្នារតាំងយូរ ដែរឬយ៉ាងណា?

  ជាក់ស្តែងនៅថ្ងៃទី២១ ខែតុលា ឆ្នាំ២០២៣ គេប្រទះឃើញមានរថយន្តធំៗប្រភេទ វ៉េអ័ង កង់ដប់ និងរថយន្តសាំយ៉ុង រាប់សិបគ្រឿងផ្ទុកដោយទំនិញពេញៗកំពុងដឹកជញ្ជូនឆ្លងទៅប្រទេសវៀតណាមតាមបណ្តោយផ្លូវលេខ ២១បេ ដោយក្នុងនោះគេឃើញមានកុងត្រូល ពុំមានដាក់ស្លាកសំគាល់ តែស្លៀកពាក់ឯកសណ្ឋានជាមន្ត្រីយោធា ៤-៥ នាក់ មិនដឹងជាស្នាក់ការអង្គភាពណាអោយប្រាកដនៅពេលដែលក្រុមការងារអ្នកសារព័ត៌មានធ្វើការសាកសួរ ថាមេបញ្ជារអោយមកដាក់ និងស្នាក់ការប៉ុស្តិ៍នគរបាលការពារព្រំដែនគោគ ចាំកាក់យកលុយ ពីរថយន្តសាំងយ៉ុងដែលដឹក ធនធានធម្មជាតិដូចជាត្រី អន្ទង់ ពស់ និងខ្យង ។ល។ឆ្លងតាមរយ:ទូកជារៀងរាល់ថ្ងៃ។

  ហើយជារៀងរាល់ល្ងាច គេប្រទះឃើញមានទូកដឹកទំនិញ ដូចជានំកញ្ចប់ របស់លេងកូនក្មេង កំប៉ុងឡេ និងទំនិញជាច្រើនមុខទៀត ចេញពីផ្សារ (ឡុងបិន) ប្រទេសវៀតណាមឆ្លងមកស្តុកទុកនៅចំនុចភូមិចុងខ្សាច់ (ក្រប៉ាល់គឿង) ភូមិក្បាលជ្រោយ សង្កាត់ឈើខ្មៅ ក្រុងសំពៅពូន បន្ទាប់មកមានរថយន្តកូរ៉េ ២-៣ គ្រឿងចូលមកដឹកយកទៅលក់បន្តនៅក្នុងរាជធានី ខេត្ត ដោយពុំដឹងថារាល់ទំនិញនាំចូលពីប្រទេសវៀតណាមដឹកតាមតាមរយ:ទូកឈើយកមកស្តុកទុកនៅចំនុចទីតាំងខាងលើ បានត្រួតពិនិត្យត្រឹមត្រូវដែររឺទេ?

  ដោយឡែកតាមការសាកសួរទៅអ្នកបើកទូកម្នាក់មិនស្គាល់អត្តសញ្ញាណ បានរៀបរាប់ថា រាល់ការដឹកជញ្ជូនរាល់ទំនិញខាងលើនេះ គឺពួកគេបានបង់លុយអោយគ្រប់ជំនាញអស់ហើយ ក្នុងមួយកន្លែងពី៥មុឺនរៀល ទៅ ៦០មុឺនរៀលឯណោះ ហេតុដូចនេះបានជាដឹកបានដោយរលូន បើមិនបង់លុយអោយទេ កុំសង្ឃឹមថាដឹកបានដោយរលូនបែបនេះ។

  ប្រជាពលរដ្ឋបានលើកឡើងថារាល់ទំនិញដែលដឹកចូលមកពីប្រទេសវៀតណាម បើសិនជាបានត្រួតពិនិត្យត្រឹមត្រូវតាមស្តង់ដារនៃច្បាប់របស់រដ្ឋ គឺពិតជាគ្មានហានិភ័យអ្វីនោះទេ ប៉ុន្តែបើគ្មានការត្រួតពិនិត្យវិញនោះ អ្នកដែលរងផលប៉ះពាល់ធំបំផុតនោះគឺប្រជាពលរដ្ឋដែលប្រើប្រាស់គ្រឿងឧបភោគបរិភោគ គ្មានគុណភាព ពិសេសក្មេងៗ ដែលចូលចិត្តហូបនំចំណី ពិសេសនំកញ្ចប់ ដែលបណ្តាលអោយប៉ះពាល់ដល់សុខភាពយ៉ាងធ្ងន់ធ្ងរ។

  ជុំវិញករណីខាងលើនេះក្រុមកាតងសមិនអាចសុំការបកស្រាយបំភ្លឺពី លោក ផាន់នី នាយប៉ុស្តិ៍នគរបាលការពារព្រំដែនគោគ ស្នាក់ការព្រែកជ្រៃ បានទេដោយខលតាមរយៈលេខទូរស័ព្ទចូលជាច្រើនដងតែពុំមានអ្នកទួល ។ រីឯប្រធានការិយាល័យគយនិងរដ្ឋាករជ្រៃធំ-ខ្នារតាំងយូរ ក្រុមការងារមិនអាចទំនាក់ទំនងបានទេ ដោយមិនស្គាល់លេខទូរស័ព្ទ ចំណែកលោក អេង សុវិចិត្រ អភិបាលក្រុងសំពៅពូន បានឆ្លើយតាមរយៈទូរស័ព្ទថា ចាំលោកត្រួតពិនិត្យការងារនេះ។

  រាល់សកម្មភាពខាងលើនេះប្រជាពលរដ្ឋស្នើរសុំ លោក អេង សុវិចិត្រ អភិបាលក្រុងសំពៅពូន ឯកឧត្តម គង់សោភ័ណ្ឌ អភិបាលនៃគណៈអភិបាលខេត្តកណ្តាល ពិសេសគោរពស្នើសុំដល់ សម្តេចធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា មេត្តាទាន មានចំណាត់ការណ៍ ដាក់កំលាំងក្រោមឲវាទត្រួតពិនិត្យ ជុំវិញករណីខាងលើនេះផងទាន ។

  អ្នកសារព័ត៌មានគ្រាន់តែជាព្រាបនាំសារ ពីថ្នាក់ក្រោមទៅរាជរដ្ឋាភិបាល រិះគន់ក្នុងន័យស្ថាបនា គ្មានចេតនាជាន់ពន្លិចស្ថាប័នពាក់ព័ន្ធណាឡើយ អង្គភាពសារព័ត៌មានយើងខ្ញុំរងចាំការបកស្រាយបំភ្លឺពីគ្រប់ស្ថាប័នពាក់ព័ន្ធ ក្នុងម៉ោងធ្វើការតាមរបបស្តីពីអ្នកសារព័ត៌មានក្នុងព្រះរាជាណាចក្រកម្ពុជា សូមអរគុណ៕

(សូមអានបន្ត)