ប្រជាពលរដ្ឋជាច្រើនគ្រួសារសំដែងការអន់ចិត្តចំពោះរដ្ឋបាលក្រុងសំពៅពូន រឿងសេវាសាធារណៈ ខណៈមន្ត្រីសាលាក្រុងបានខ្ជីខ្ជាអូសបន្លាយពេលវេលា ធ្វើសេចក្តីចម្លងសំបុត្រកំណើតរាប់ខែមិនទាន់បាន...

 ផ្សាយចេញ ០៣.១០.២០២៣

 ខេត្តកណ្តាល ÷ ប្រជាពលរដ្ឋទាំង៥សង្កាត់ រួមមាន= សង្កាត់ព្រែកស្តី សង្កាត់ជ្រោយតាកែវ សង្កាត់សំពៅពូន សង្កាត់ឈើខ្មៅ និងសង្កាត់ព្រែកជ្រៃ បានរអ៊ូរទាំថែមទាំងអាក់អន់ចិត្តជាខ្លាំងចំពោះរដ្ឋបាលក្រុងសំពៅពូន ដែលបានខ្ជីខ្ជាអូសបន្លាយពេលវេលារាប់ខែក្នុងការធ្វើសេចក្តីចម្លងសំបុត្រកំណើត។

 ប្រជាពលរដ្ឋបានលើកឡើងថា ពួកបានយកឯកសារ ( សំបុត្រកំណើត) ទៅធ្វើសេចក្តីចម្លងសំបុត្រកំណើត ដើម្បីយកធ្វើសៀវភៅគ្រួសារ និងសៀវភៅស្នាក់នៅ តាំងពីខែ៦ ខ្លះខែ៧ ឆ្នាំ ២០២៣ រហូតមកទល់ពេលបច្ចុប្បន្ននេះខែ១០ ឆ្នាំ២០២៣ មានរយៈពេល ៣-៤ខែទៅហើយ នៅតែមិនទាន់ទទួលបាននូវឯកសារនោះឡើយ ដោយខុសផ្ទុយស្រលះ នៅក្នុងបង្កាន់ដៃ ដែលបានដាក់កំណត់រយះពេល៣-៤ថ្ងៃ អាចមកទទួលយកឯកសារនោះបាន ។

 ដោយឡែកងាកមកមើលមន្ត្រីដែលបំរើការងារនៅក្នុងរដ្ឋបាលក្រុងច្រកចេញចូលតែមួយឯនេះវិញ ម្នាក់ៗមិនបានយកចិត្តទុកដាក់បំពេញតួនាទីរបស់ខ្លួនទេ ក្នុងម៉ោងធ្វើការនាំហូបម្ជូរ ប្រលែងគ្នាលេងយ៉ាងរំភើយ ដោយមិនគោរពបទបញ្ជាផ្ទៃក្នុង ដែលថ្នាក់លើបានដាក់អោយ (ស៊ីប្រាក់ខែរាស្រ្តមិនបម្រើរាស្ត្រ) នេះជាហេតុធ្វើអោយយឺតយ៉ាវការងាររបស់ប្រជាពលរដ្ឋ។

ប្រជាពលរដ្ឋសំណូមពរដល់លោក អេង សុវិចិត្រ អភិបាលក្រុងសំពៅពូន មេត្តាត្រួតពិនិត្យឡើងវិញមន្ត្រីក្រោមឱវាទ ដែលខ្ជះខ្ជាយពេលវេលាក្នុងម៉ោងការងារ មិនបានបំពេញកាតព្វកិច្ចរបស់ខ្លួនក្នុងនាមជាមន្ត្ត្រីសាលាក្រុងច្រកចេញចូលតែមួយ ដែលធ្វើអោយប៉ះពាល់កិត្តិយសសេចក្តីថ្លៃថ្នូរដល់មន្ត្រីល្អៗដទៃទៀត និងគោរពស្នើរសុំដល់ឯកឧត្តម គង់ សោភ័ណ្ឌ អភិបាលនៃគណៈអភិបាលខេត្តកណ្តាល សូមទានមេត្តាមានវិធានការណ៍ទប់ស្កាត់នូវមន្ត្រីក្រោមឱវាទផងទាន៕