នាយឧត្តមសេនីយ៍ ស ថេត បានក្រើនរំលឹក និងដាក់បទបញ្ជាដល់កងកម្លាំងនគរបាលទាំងអស់ ត្រូវធានាសន្ដិសុខ សណ្ដាប់ធ្នាប់ក្នុងសង្គម ដើម្បីបន្ដការអភិវឌ្ឍរីកចម្រើនរបស់ប្រទេសជាតិ

ផ្សាយចេញពីក្រុងសំពៅពូន ៣០,០៧,២០២៤

ខេត្តកំពង់ធំ ៖ នាយឧត្តមសេនីយ៍ ស ថេត អគ្គស្នងការនគរបាលជាតិ បានក្រើនរំលឹក និងដាក់បទបញ្ជាដល់កងកម្លាំងនគរបាលទាំងអស់ ត្រូវបន្ដធានារក្សាឲ្យបាននូវសន្ដិសុខ សណ្ដាប់ធ្នាប់ និងរបៀបរៀបរយនៅក្នុងសង្គម ដើម្បីបន្ដការអភិវឌ្ឍរីកចម្រើនរបស់ប្រទេសជាតិ ក្រោមម្លប់សន្ដិភាព។

ក្នុងឱកាសអញ្ជើញប្រកាសចូលកាន់តំណែងលោកឧត្តមសេនីយ៍ត្រី ហេង សុផល ជាស្នងការនគរបាលខេត្តកំពង់ធំ នៅព្រឹកថ្ងៃទី៣០ ខែកក្កដា ឆ្នាំ២០២៤នេះ នាយឧត្តមសេនីយ៍ ស ថេត បានអះអាងថា ប្រសិនបើមូលដ្ឋានប្រទេសកម្ពុជាមិនមានសន្ដិសុខ សណ្ដាប់ធ្នាប់ទេនោះ ក៏មិនមានអ្នកវិនិយោគណាមករកស៉ីបណ្ដាក់ទុនឡើយ។

នាយឧត្តមសេនីយ៍ ស ថេត បានកត់សម្គាល់ថា ស្នងការនគរបាលខេត្តទាំងអស់ និយាយជារួម និងនិយាយដោយឡែក ស្នងការនគរបាលខេត្តកំពង់ធំ ត្រូវធ្វើជាសេនាធិការឲ្យគណៈបញ្ជាការឯកភាពខេត្តឲ្យបានល្អ ពោលត្រូវក្ដាប់ឲ្យបានរៀងរាល់ថ្ងៃ ដើម្បីមានជារបាយការណ៍ ឬហេតុការណ៍កើតបន្ទាន់ត្រូវរាយការណ៍ផ្ទាល់មាត់ដោយសង្ខេបដើម្បីសុំគោលការណ៍ចាត់ការ។

ដោយឡែក ប្រធានគណៈបញ្ជាការឯកភាព ក៏មានតួនាទីយ៉ាងសំខាន់ ក្នុងការដឹកនាំសម្របសម្រួល ដឹកនាំបញ្ជាកម្លាំងសរុប មធ្យោបាយសរុប ដើម្បីបំពេញប្រតិបត្តិការនៅក្នុងខេត្តរបស់ខ្លួន ហើយបើរក្សាសន្ដិសុខមិនបានទេ បង្កើតជាកង្វល់ដល់អង្គភាពទាំងអស់ចំណុះរដ្ឋបាលខេត្ត ដូច្នេះការប្រើប្រាស់កម្លាំងសរុប មធ្យោបាយសរុប ជារឿងដែលសំខាន់ចាំបាច់បំផុត។

នាយឧត្តមសេនីយ៍ ស ថេត សង្ឃឹមជឿជាក់ថា ស្នងការថ្មីនឹងដឹកនាំកាន់តែល្អប្រសើរបន្ថែមទៀត ដោយសហការល្អជាមួយបណ្ដាអង្គភាពកងកម្លាំងប្រដាប់អាវុធផ្សេងទៀត។ នាយឧត្តមសេនីយ៍ ចាត់ទុកថា គ្រប់អង្គភាពទាំងអស់មិនត្រូវគិតថា ការរក្សាសន្ដិសុខ សណ្ដាប់ធ្នាប់ ជាសមត្ថកិច្ចផ្ដាច់មុខរបស់អង្គភាពណាមួយនោះទេ ពោលត្រូវតែសហការគ្នាឲ្យបានល្អ ទាំងអង្គភាពស៉ីវិលផងដែរ។

នាយឧត្តមសេនីយ៍ ស ថេត ក៏បានដាក់ចេញបទបញ្ជាឲ្យពង្រឹងសមត្ថភាពនគរបាល ពង្រឹងសមត្ថភាពមន្ដ្រីពាក់ព័ន្ធ ធ្វើផែនការឲ្យបានលម្អិត និងវាយតម្លៃសភាពការណ៍ ឲ្យបានច្បាស់លាស់ទាំងខាងក្រៅ និងខាងក្នុង ដោយមិនត្រូវបណ្ដែតបណ្ដោយជាសុខសន្ដិភាពដែលកំពុងមាននោះទេ។

នាយឧត្តមសេនីយ៍ អគ្គស្នងការនគរបាលជាតិ បានណែនាំឲ្យយកចិត្តទុកដាក់កង្វល់របស់ប្រជាពលរដ្ឋ ចំពោះការអនុវត្តច្បាប់របស់មន្ដ្រី ពិសេសមន្ដ្រីនគរបាលចរាចរណ៍ផ្លូវគោក ពោលត្រូវអនុវត្តប្រកបដោយសីលធម៌ គុណធម៌ និងត្រូវបម្រើសេវាជូនប្រជាពលរដ្ឋតាមមូលដ្ឋានប្រកបដោយការទទួលខុសត្រូវ។ លើសពីនេះ ត្រូវយកពង្រឹងលើការងារផ្សព្វផ្សាយអប់រំអំពីច្បាប់ចរាចរណ៍ផ្លូវគោក ឲ្យចំមុខសញ្ញា ខណៈគ្រោះថ្នាក់ចរាចរណ៍នៅតែជាក្ដីកង្វល់នៅពេលបច្ចុប្បន្ននេះ។

ជាមួយគ្នានោះដែរ ឯកឧត្តម នួន ផារ័ត្ន អភិបាលខេត្តកំពង់ធំ បានកោតសរសើរដល់លោកឧត្តមសេនីយ៍ទោ ម៉ែនលី អតីតស្នងការនគរបាលខេត្ត ដែលបានដឹកនាំសហការីរបស់ខ្លួនបានយ៉ាងល្អ ព្រមទាំងសម្តែងនូវការសាទរ ចំពោះលោកឧត្តមសេនីយ៍ត្រី ហេង សុផល ដែលត្រូវបានតែងតាំងជាស្នងការនគរបាលខេត្តកំពង់ធំ នឹងបន្តបេសកកម្មដឹកនាំស្នងការដ្ឋាននគរបាលខេត្តកំពង់ធំ ដើម្បីថែរក្សាសន្តិសុខ សុវត្ថិភាពសាធាណៈក្នុងខេត្តកំពង់ធំ ឲ្យកាន់តែប្រសើរឡើងថែមទៀត ។

(សូមអានបន្ត)

ឯកឧត្ដម ប៉ាន់ ខែមប៊ុនថន រដ្ឋលេខាធិការទីស្តីការគណៈរដ្ឋមន្ត្រី អញ្ជើញជួបសំណេះសំណាល ជាមួយប្រជាពលរដ្ឋឃុំច្រណូក ស្រុកកំពង់លែង ខេត្តកំពង់ឆ្នាំង

ផ្សាយចេញពីក្រុងសំពៅពូន ២៣,០៧,២០២៤

កំពង់ឆ្នាំង÷នៅព្រឹកថ្ងៃទី២៣ ខែកក្កដា ឆ្នាំ២០២៤ ឯកឧត្ដម ប៉ាន់ ខែមប៊ុនថន រដ្ឋលេខាធិការទីស្តីការគណៈរដ្ឋមន្ត្រី និងជានាយករងខុទ្ទកាល័យសម្តេចមហាបវរធិបតី នាយករដ្ឋមន្ត្រីនៃព្រះរាជាណាចក្រកម្ពុជា ដោយមានការអញ្ជើញចូលរួមពីសំណាក់លោកជំទាវ កែ ច័ន្ទមុនី តំណាងរាស្ត្រមណ្ឌលកំពង់ឆ្នាំង ឯកឧត្តម ស៊ុន សុវណ្ណារិទ្ធ អភិបាលនៃគណៈអភិបាលខេត្តកំពង់ឆ្នាំង លោក សាន់ យូ អភិបាលរងខេត្ត  អញ្ជើញជួបសំណេះសំណាល ជាមួយប្រជាពលរដ្ឋឃុំច្រណូក ស្រុកកំពង់លែង ដែលបានស្នើសុំមកកាន់អាជ្ញាធរខេត្ត ក្នុងការបន្តធ្វើស្រែលើដីតំបន់៣ ឆ្នាំបន្ទាប់ វត្តមានឯកឧត្តម លោកជំទាវ អស់លោក លោកស្រី ជាច្រើនរូប អាជ្ញាធរស្រុក អាជ្ញាធរឃុំកងកម្លាំងនិងប្រជាពលរដ្ឋ។ ក្នុងពិធីនេះផងដែរក៏មានការដាំដើមឈើជានិមិត្តរូបនៅក្នុងឃុំច្រណូក។

ក្នុងពិធីនេះផងដែរ ឯកឧត្ដម ប៉ាន់ ខែមប៊ុនថន បានរំលឹកអនុស្សាវរីយ៍កាលពី ២០ ឆ្នាំមុន ដែលឯកឧត្តម ធ្លាប់មានទំនាក់ទំនង និងការងារជាច្រើន ជាមួយប្រជាពលរដ្ឋនៅក្នុងស្រុកកំពង់លែង ជាពិសេសនៅក្នុងឃុំច្រណូក  និងបានបង្ហាញភាពស្និទ្ធស្នាលរាក់ទាក់ពីសំណាក់ប្រជាពលរដ្ឋផងដែរ។ 

ក្នុងនោះផងដែរ ឯកឧត្តម ប៉ាន់ ខែមប៊ុនថនបានផ្ដាំផ្ញើទៅបងប្អូនប្រជាពលរដ្ឋដែលមានដីអាស្រ័យផលនៅតំបន់បីឱ្យអាស្រ័យផល ១ឆ្នាំ ហើយ ឯកឧត្តម ហាមទន្ទ្រានដីថ្មីនិងហាមកាប់ដើមឈើ នៅក្នុងតំបន់ 3 ដែលច្បាប់ហាមឃាត់មិនឲ្យបន្តទៅទៀតឡើយ។

ឯកឧត្តម ស៊ុន សុវណ្ណារិទ្ធ អភិបាលនៃគណៈអភិបាលខេត្ត បានបញ្ជាក់ជូនប្រជាពលរដ្ឋឲ្យដឹងថា ចំពោះប្រជាពលរដ្ឋ ដែលមានបំណង ធ្វើស្រែលើដីតំបន់៣  សូមអញ្ជើញមកសាលាឃុំ ធ្វើលិខិតកិច្ចសន្យាស្នើសុំដីអាស្រ័យផលបន្ត ដើម្បីឲ្យក្រុមការងារទាំងអាជ្ញាធរខេត្ត ស្រុក និងឃុំ ធ្វើការពិនិត្យជាក់ស្ដែង និងរៀបចំឯកសារតាមនីតិវិធីដូចឆ្នាំកន្លងមក។  ឯកឧត្តមបានបន្ថែមថា នៅក្នុងស្រុកកំពង់លែង គឺមានចំនួន ៩ ឃុំ មានឃុំចំនួន ៧ ដែលមានដីស្រែ សម្រាប់អាស្រ័យផលស្រូវ ទាំងក្នុងតំបន់២ និងក្នុងតំបន់៣។

ទន្ទឹមនោះផងដែរ ប្រជាពលរដ្ឋនៅឃុំច្រណូក ក៏សូមអបអរសាទរ ជូនចំពោះថ្នាក់ដឹកនាំទាំងអស់ ដែលបានគិតគូរ អំពីសុខទុក្ខ របស់ប្រជាពលរដ្ឋ ដែលមានមុខរបរស្រែចំការ សូមជួបនូវពុទ្ធពរ៤ប្រការ អាយុ វណ្ណៈ សុខ: ពល: កុំបីឃ្លៀងឃ្លាតឡើយ។

(សូមអានបន្ត)

នាយខណ្ឌរដ្ឋបាលជលផលកណ្តាល ឃាត់ខ្លួនជនសង្ស័យម្នាក់ដែលលួចផលិតឧបករណ៍នេសាទខុសច្បាប់ នៅស្រុកខ្សាច់កណ្ដាល ខេត្តកណ្ដាល

ផ្សាយចេញពីក្រុងសំពៅពូន ១៦ កក្កដា ២០២៤

ខេត្តកណ្ដាល៖ ខណ្ឌរដ្ឋបាលជលផលខេត្តកណ្តាល នៅព្រឹកថ្ងៃទី១៥ ខែកក្កដា ឆ្នាំ២០២៤នេះ បានសហការ ជាមួយអាជ្ញាធរមូលដ្ឋាន និងព្រះរាជអាជ្ញារងខេត្តកណ្តាល ចុះត្រួតពិនិត្យ និងឆែកឆេរទីតាំងលួចផលិតឧបករណ៍នេសាទខុសច្បាប់(អំភ្លីឆក់ត្រី)មួយកន្លែងស្ថិតនៅភូមិទ្រាំងលើ ឃុំតាឯក ស្រុកខ្សាច់កណ្តាល ខេត្តកណ្តាល ដោយធ្វើការឃាត់ខ្លួនជនសង្ស័យម្នាក់ និងឧបករណ៍នេសាទខុសច្បាប់មួយចំនួន។ 

លោក ហេង សុភារិទ្ធ នាយខណ្ឌរដ្ឋបាលជលផលកណ្តាល បានបញ្ជាក់ថា៖ ប្រតិបត្តិការរហូតឈានដល់ឃាត់ខ្លួនជនសង្ស័យម្នាក់ដែលជាអ្នកផលិត និង ចែកចាយនូវឧបករណ៍នេសាទខុសច្បាប់នេះ  គឺបានធ្វើឡើងបន្ទាប់ពីមានបទបញ្ជារបស់ឯកឧត្ដម គួច ចំរើន អភិបាល នៃគណៈអភិបាលខេត្តកណ្តាល ក្រោយពីជនសង្ស័យបានបង្ហោះលើបណ្តាញសង្គម តិកតុកដាក់លក់ នូវឧបករណ៍ខុសច្បាប់ទាំងនេះជាសាធារណៈ ខណៈករណីនេះជនសង្ស័យបានសារភាពថាគេពិតជាបានលួចផលិតមែន និងបានចែកចាយលក់នៅតាមបណ្តាខេត្តមួយចំនួនផងដែរ។

  

បើតាមលោក ហេង សុភារិទ្ធ បានឲ្យដឹងផងដែរ ក្រោយធ្វើការឃាត់ខ្លួន និងរឹបអូសនូវវត្ថុតាងជនសង្ស័យត្រូវបានរៀបចំសំណុំរឿងបញ្ជូនទៅកាន់តុលាការចាត់ការទៅតាមនីតិវិធីច្បាប់ផងដែរ ខណៈករណីនេះជាបទល្មើសនេសាទ ដោយមិនអាចអនុគ្រោះបានឡើយ ដោយសារតែជនសង្ស័យរូបនេះបានលួចផលិតនូវឧបករណ៍ខុសច្បាប់នេះយូរមកហើយនោះ។ 

ជាមួយគ្នានោះដែរ លោក ហេង សុភារិទ្ធ ក៏បានធ្វើការអំពាវនាវដល់បងប្អូនប្រជាពលរដ្ឋទាំងអស់ គប្បីត្រូវធ្វើការសហការជាមួយអាជ្ញាធរ ឬរដ្ឋបាលជលផលដើម្បីធ្វើយ៉ាងណាលុបបំបាត់បទល្មើសនេសាទ ខុសច្បាប់នៅតាមភូមិ និងសហគមន៍របស់បងប្អូនផងដែរ ហើយប្រសិនបើប្រពលរដ្ឋណាដែលបាននេ សាទ ឬលួចផលិតឧបករណ៍នេសាទខុសច្បាប់នឹងចាត់វិធានការភ្លាមៗដោយគ្មានការលើកលែងនោះឡើយ៕

(សូមអានបន្ត)

អាជ្ញាធរខេត្តកំពង់ធំ ហាមដាច់ខាតចំពោះជនខិលខូចណា ដែលមករុករានទន្ទ្រានរំលោភយកដីរដ្ឋនៅតំបន់៣ ក្នុងភូមិសាស្ត្រខេត្តកំពង់ធំ...

ផ្សាយចេញពីក្រុងសំពៅពូន ១៤, ០៧, ២០២៤

ខេត្តកំពង់ធំ ៖ នៅក្នុងឱកាសអញ្ជើញចុះត្រួតពិនិត្យដីតំបន់បី នៅក្នុងស្រុកកំពង់ស្វាយ នាព្រឹកថ្ងៃទី១៤ ខែកក្កដា ឆ្នាំ២០២៤ ឯកឧត្តម នួន ផារ័ត្ន អភិបាលខេត្តកំពង់ធំ ហាមដាច់ខាតចំពោះជនខិលខូចណា ដែលមករុករានទន្ទ្រានរំលោភយកដីរដ្ឋនៅតំបន់៣ ក្នុងភូមិសាស្ត្រខេត្តកំពង់ធំ មកធ្វើជាកម្មសិទ្ធិរបស់ខ្លួន ព្រមទាំងអំពាវនាវប្រជាពលរដ្ឋ ត្រូវហ៊ានរាយការណ៍ ចំពោះជនណាមកទន្ទ្រានដីតំបន់៣ ដែលបានកាត់ឆ្វៀលរួច។

ថ្លែងនៅចំពោះមុខប្រជាពលរដ្ឋ និងអាជ្ញាធរពាក់ព័ន្ធ ឯកឧត្តម នួន ផារ័ត្ន បានណែនាំដល់កងកម្លាំងមានសមត្ថកិច្ច និងអាជ្ញាធរមូលដ្ឋាន បន្តចុះរឹតបណ្តឹងទប់ស្កាត់ ការចូលទៅអាស្រ័យផលដីតំបន់៣ ក្រៅពីដីតំបន់ឆ្វៀល ក្នុងភូមិសាស្ត្រខេត្តកំពង់ធំ ឲ្យមានប្រសិទ្ធភាព។

ឆ្លៀតក្នុងឱកាសនៃការចុះត្រួតពិនិត្យនេះ ឯកឧត្តមអភិបាលខេត្តកំពង់ធំបានចុះសាកសួរសុខទុក្ខ និងឧបត្ថម្ភជាសម្ភារៈ និងថវិកាមួយចំនួន ដល់កងកម្លាំងដែលប្រចាំនៅគណៈបញ្ជាការស្រាលផងដែរ។

សូមបញ្ជាក់ផងដែរថាៈ ប្រតិបត្តិការចុះត្រួតពិនិត្យទីតាំងដីតំបន់បីនេះ ស្ថិតនៅតំបន់ (ខ្វាក់ទោច ខ្វាក់ធំ) នៅឃុំកំពង់គោ ស្រុកកំពង់ស្វាយ ខេត្តកំពង់ធំ ដោយសារតែបច្ចុប្បន្ននេះ ជនខិលខូចកំពុងតែរំលោភបំពានយកដីធ្វើស្រែប្រាំង៕

(សូមអានបន្ត)

ល្បែងសុីសងផ្សងសំណាងប្រភេទយោគី តាមអនឡាញ ក្នុងភូមិសំរោង សង្កាត់ផ្សារឆ្នាំង កំពុងតែបើកលេងយ៉ាងអនាធិបតេយ្យ!ដោយឡែកសមត្ថកិច្ចក្នុងមូលដ្ឋានមិនទប់ស្កាត់ និងបង្ក្រាប!

ផ្សាយចេញពីក្រុងសំពៅពូន ១៤,កក្កដា,២០២៤

ខេត្តកំពង់ឆ្នាំង ÷ ប្រិយមិត្តជាទីរាប់អាន ល្បែងស៊ីសងមានជល់តាមប្រព័ន្ធអនឡាញគ្រប់ប្រភេទ ត្រូវបានបិទមួយរយៈពេលខ្លី បន្ទាប់ពីមានបទបញ្ជារដ៏មុឹងម៉ាត់របស់ប្រមុខរាជរដ្ឋាភិបាល ពិសេសសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានអោយអភិបាលរាជធានី ខេត្ត ក្រុង ទូទាំងប្រទេសបិទឲ្យអស់រាល់ល្បែងសុីសងគ្រប់ប្រភេទ ដែលមានក្នុងដែនសមត្ថកិច្ចរបស់ខ្លួន កាលពីថ្ងៃទី១៨ ខែកុម្ភៈ ឆ្នាំ២០២៤ កន្លងទៅថ្មីៗនេះ។

សម្ដេច នាយករដ្ឋមន្ត្រី បានមានប្រសាសន៍បន្តថា ពេលនេះមិនមែនជាពេលដែលពង្រាយ រាល់ល្បែងសុីសងនោះទេ ព្រោះថាល្បែងស៊ីសងទាំងនេះមិនមែនជាកំណើនសេដ្ឋកិច្ចរបស់ជាតិនោះឡើយ...។

ប៉ុន្តែបើទោះបីជាម្រមុខរាជរដ្ឋាភិបាលបានមានប្រសាសន៍និងមានបទបញ្ជារយ៉ាងនេះក្តី យើងសង្កេតឃើញថា ល្បែងស៊ីសងទាំងនោះ ពិសេសល្បែងសុីសងប្រភេទ ឡូតូ យោគីតាមប្រព័ន្ធអនឡាញ នៅតែបន្តបើកលេងយ៉ាងគគ្លើន  នៅក្នុងភូមិសំរោង សង្កាត់ផ្សារឆ្នាំង ក្រុងកំពង់ឆ្នាំង ខេត្តកំពង់ឆ្នាំង កំពុងតែដំណើរការលេងបានយ៉ាងរលូន ដោយមិនដឹងថាសមត្ថកិច្ចក្នុងមូលដ្ឋានបានដឹងរឺពុំដឹងនោះឡើយ។

ជាក់ស្តែងនៅព្រឹកថ្ងៃទី១៤ ខែកក្កដា ឆ្នាំ២០២៤ នេះគេប្រទះឃើញ ផ្ទះលក់ចាប់ហួយមួយ ស្ថិតនៅក្នុងភូមិសំរោង សង្កាត់ផ្សារឆ្នាំង បានដាក់កញ្ចក់ទូរទស្សន៍ បើកល្បែងសុីសង យ៉ាងរំភើយ ដោយទីតាំងនេះនៅមិនឆ្ងាយពីសាលាសង្កាត់ប៉ុន្មានឡើយ ហេតុអ្វីបានជាអាជ្ញាធរមានសមត្ថកិច្ច បណ្តែតបណ្តោយអោយមានបទល្មើសល្បែងសុីសងនៅក្នុងមូលដ្ឋានគ្រប់គ្រងរបស់ខ្លួនទៅវិញ? រឺមួយក៏មិនបានដឹង។

អង្គភាពយើងមិនអាចសុំការបំភ្លឺពីលោក ជីវ ចាន់លី នាយប៉ុស្តិ៍សង្កាត់ផ្សារឆ្នាំង បាននោះទេ ដោយពុំមានលេខទូរស័ព្ទ។

- តើភូមិ ឃុំ មានសុវត្ថិភាពយ៉ាងដូចម្តេចទៅ បើល្បែងសុីសងគគ្រឹកគគ្រេងម្លុឹងៗ?

ទោះជាយ៉ាងនេះក្តីប្រជាពលរដ្ឋក្នុងមូលសំណូមពរទៅដល់ លោកវីរៈសេនីយ៍ឯក ឆាយ ខេមរត្ន័ អធិការក្រុងកំពង់ឆ្នាំង មេត្តាទាន មានវិធានការណ៍ចាត់កម្លាំងក្រោមឱវាទ ដើម្បីធ្វើការទប់ស្កាត់ និងបង្ក្រាបរាល់ល្បែងសុីសងនៅចំណុចខាងលើផងទាន! ដើម្បីរក្សាបាននៅគោលនយោបាយ ភូមិ ឃុំ មានសុវត្ថិភាព បញ្ជៀសនូវ អំពើចោរកម្មផ្សេងៗ ដូចជា លួច ឆក់ និងអំពើហឹង្សាក្នុងគ្រួសារដោយសារតែល្បែងសុីសង ជាដើម។ល។ 

ទោះជាយ៉ាងណា អង្គភាពសារព័ត៌យើងរងចាំបំភ្លឺពីគ្រប់គ្រប់ស្ថាប័នពាក់ព័ន្ធ ក្នុងម៉ោងធ្វើការ ស្របតាមច្បាប់ស្តីពីសារព័ត៌មានក្នុងព្រះរាជាណាចក្រកម្ពុជា សូមអរគុណ៕

(សូមអានបន្ត)