ប្រជាពលរដ្ឋនៅឃុំព្រះដាក់ មិនត្រូវបានឱ្យចាកចេញ ប៉ុន្ដែហាមសំណង់ធ្វើថ្មីលើដីចាស់បន្តទៀត
សៀមរាប៖ ឯកឧត្ដម ជា សុផារ៉ា ឧបនាយករដ្ឋមន្ដ្រី រដ្ឋមន្ដ្រីក្រសួងរៀបចំដែនដីនគររូបនីយកម្ម និងសំណង់ បានបញ្ជាក់ថា ប្រជាពលរដ្ឋដែលមានលំនៅឋាន នៅឃុំព្រះដាក់ ស្រុកបន្ទាយស្រី ចំនួន ៦ភូមិ មិនតម្រូវឱ្យរុះរើសំណង់នោះឡើយ ប៉ុន្ដែប្រជាពលរដ្ឋត្រូវសហការគ្នាមិនសាងសង់សំណង់ខុសច្បាប់ និងមិនឱ្យលក់ដីធ្លីក្នុងតំបន់រមណីយដ្ឋានអង្គរ។
ឯកឧត្ដម ជា សុផារ៉ា បានថ្លែងបែបនេះ នៅក្នុងពិធីសំណេះសំណាលជាមួយប្រជាពលរដ្ឋនៅឃុំព្រះដាក់ ស្រុកបន្ទាយស្រី នាថ្ងៃទី៧ខែតុលាឆ្នាំ២០២២នេះ។ ឯកឧត្ដម មានប្រសាសន៍ថា ប្រជាពលរដ្ឋចំនួន ៦ភូមិ នៅឃុំព្រះដាក់ រក្សានៅស្ថានភាពដដែល ដោយមិនត្រូវមានការសាងសង់សំណង់ខុសច្បាប់ ដែលនាំឱ្យមានផលប៉ះពាល់ដល់សោភ័ណ្ឌភាពសម្បត្ដិបេតិកភណ្ឌជាតិ ។ ឯកឧត្ដមបានបន្ដថា រមណីយដ្ឋានអង្គរជដែលត្រូវបានចុះក្នុងបញ្ជីសម្បត្ដិបេតិកភណ្ឌពិភពលោក មានសារៈសំខាន់ក្នុងការលំហូរចូល នៃភ្ញៀវទេសចរគ្រប់ជាតិសាសន៍។ ការលំហូរអ្នកទេសចរបានផ្ដល់ចំណូលថវិកាដល់ប្រជាពលរដ្ឋខ្មែរ ដូចនេះប្រជាពលរដ្ឋខ្មែរត្រូវចូលរួមថែរក្សា ។ ឯកឧត្ដមបានបន្ថែមថា ឃុំព្រះដាក់ជាតំបន់កសិទេសចរដ៏សំខាន់ ដែលធ្វើឱ្យក្រុមឈ្មួញចង់បានដីនៅទីនោះ ដែលបណ្ដាលឱ្យមានអ្នកចំណូលថ្មីប៉ះពាល់ដល់របៀបរបបនៃការរស់នៅរបស់ប្រជាពលរដ្ឋ។ ឯកឧត្ដមបញ្ជាក់ថា មកដល់ពេលនេះ សំណង់ខុសច្បាប់មានការកើនឡើងដល់២២៤០ករណី គួរឱ្យព្រួយបារម្ភ។
បើតាមឯកឧត្ដម ជា សុផារ៉ា បានឱ្យដឹងថា ភូមិចំនួន៦នៅឃុំព្រះដាក់ដែលមិនត្រូវឱ្យចាកចេញពីតំបន់អង្គរនេះ រួមមាន ភូមិព្រះដាក់ ភូមិថ្នល់បណ្ដោយ ភូមិថ្នល់ទទឹង អូរទទឺង ភូមិតាត្រៃ ភូមិតាកុះ ។ ភូមិទាំង៦នេះ មានការកើនឡើងនៃសំណង់ខុសច្បាប់នោះ រួមមាន នៅក្នុងភូមិព្រះដាក់កើនឡើង ៥០៩គ្រួសារ ភូមិថ្នល់បណ្ដោយកើនឡើង១១៤គ្រួសារ ភូមិថ្នល់ទទឹង២៨០គ្រួសារ នៅភូមិតាត្រៃកើនឡើង៣៣២ គ្រួសារ នៅភូមិតាកុះកើន៦៨៤ នៅអូទទឹងកើន៣៩១គ្រួសារ៕
0 Comments:
Post a Comment